Davao City – Kampante ang lokal nga gobyerno sa Island Garden City of Samal (IGaCoS) nga walay Locally Stranded Individual (LSIs) ug Returning Overseas Filipino Workers (OFWs) ang maghunahuna og iskapo gikan sa ilang mga COVID-19 isolation facilities.
Matud ni IGaCoS Mayor Al David Uy nga giako sa kagamhanang lokal sa Samal ang tanang gikinahanglan sama sa pagkaon gikan buntag, paniadto, ug panihapon sa mga LSI nga mabutang sa ilang isolation facilities.
Segun ni Mayor Uy nga ila usab gitauran og wifi ang mga isolation facilities aron malingaw ug dili abtan og kapuol ug makahunahuna og iskapo ang mga LSI ug OFW nga muabot ug muuli sa ilang syudad.
Suma ni Mayor Uy nga duna sa’y mga security personnel nagbantay sa mga isolation facilities 24 oras ug niana walay gipang quarantine ang makasibat sama sa nahitabo sa Sto.Tomas, Davao Del Norte.
Hinoon bisan pa og maka-iskapo ang mga LSI ug mga OFW gikan sa mga isolation facilities dili gihapon sila makalayas sa isla tungod sa pantalan palang maharang na sila sa mga tinugyanan sa balaud.
Usa ka semana magpuyo sa isolation facility ang mga LSI ug mga OFW ug kung mag-negatibo sila sa swab test pagawason sila sa quarantine facilities aron makauli ug makauban ang ilang mga pamilya.
Nakig-koordinar ang Samal LGU sa mga barangay opisyales aron kon dunay mga LSI musibat ug muuli sa ilang mga balay dayon mataho ug makuha sila pag-usab ug mabalik sa pasilidad asa sila gi-quarantine.
RadyoMaN Joel Viray
