Photo Courtesy: Nico Cinco
Gi-anunsiyo kagahapon sa Inter-Agency Task Force COVID-19 sa probinsiya sa Misamis Occidental nga namatay niadtong Miyerkoles sa gabii ang lalaking pasyente sa COVID-19 nga residente sa lungsod sa Tudela.
Namatay kini sa Mayor Hilarion A. Ramiro Sr. Medical Center (MHARS MC) sa Ozamiz City kung asa kini gi-admit.
Si patient o PH 4085 na-admit niadtong Marso 27 tungod sa iyang gibating ubo ug paglisod sa pag-ginhawa sugod niadtong Marso 24.
Aduna kini travel history sa Cebu City, sumala ni Department of Health X Regional Director Dr. Adriano Subaan, atol sa virtual press briefing niadtong Martes.
Matud pa ni Misamis Occidental Governor Philip Tan nga anaa na unta sa iyang ika-onse (11th) ka adlaw sa tambalanan ang 69 anyos nga pasyente human makuha ang positibong resulta sa iyang COVID test niadtong Abril 4.
Gibisita pa niya kini, matud pa, alas-6:00 sa gabii niadtong Miyerkoles ug iyang nasuta nga wala na kini hilanat ug ang resulta sa X-ray, nag-improve na.
Nag-suspetsa, matud pa, ang mga doktor sa tambalanan nga namatay kini sa cardiac arrest tungod kay tulog man kini dihang nabugtu-an sa iyang kinabuhi.
Gikuhaan og swab sample ang pasyente aron masuta kung positibo pa ba kini sa COVID sa higayon sa iyang pagkamatay.
Niadtong Abril 10, Biyernes Santo, gi-anunsiyo ni Governor Tan nga naka-recover na ang laing COVID patient nga taga lungsod sa Jimenez human nag-negatibo ang repeat confirmatory test niini.
Nakagawas na sa tambalanan ang maong pasyente. (Divina M. Suson, Misamis Occidental, Abril 17)
