Davao City – Usa ang Purok Isla Suerte sa Barangay 76-A sa mga lugar dinhi sa syudad nga dili na buot paadtuan ni Mayor Inday Sara Duterte-Carpio sa mga taga Davao tungod sa posibilidad nga pagsaka sa mga matakdan sa COVID-19 human nga pipila ka mga residente sa nasangpit nga dapit napalgang naligo og dagat, wala magsunod sa physical or social distancing ingon man sa pagsuot og facemask.
Giangkon ni Barangay 76-A Kagawad Randy Ponteras nga niadtong tungora, walay mga barangay tanod nagbantay sa dapit nunot sa makusog nga bundak sa ulan maong nakalugar ang pipila ka mga residente sa pagligo og dagat hinungdan nga mihimo na’g lakang ang Barangay Council aron ilhon ang naasoy nga mga indibidwal.
Kung ugaling mailhan na gilayon ang mga gikatahong residente, ipatawag sila pormal ni Barangay Captain Rolando Trajera aron pahimangnoan ingon man i-paubos sa home quarantine ug kon magpositibo sa COVID-19, awtomatikong i-lockdown kun gikinahanglan ang ilang dapit, sumala ni Ponteras.
Suportado ni Ponteras ang panawagan sa alkalde ning syudad nga dili una adtoan ang maong mga barangay sa San Antonio sa Agdao, San Juan sa Bangkal ug sa Isla Suerte tungod sa posibleng pagtinakdanay sa virus sa matag usa kanila.
Gipaboran ni Ponteras ang sugyot sa kadaghanan nga mas maayong pabug-atan ang silot sa mga gahi’g ulo diha sa pagsunod sa Omnibus Guidelines on Community Quarantine nga gipasar sa Inter-Agency Task Force on the Management of Emerging Infectious Diseases (IATF-EID).
RadyoMaN Joel Viray
