Davao City – Dili makasumpaki sa tinuhoan sa relihiyon ang cremation sa rason nga wala kini nakalatid sa Balaang Kasulatan kun sala ba o dili atubangan sa Dios ang paghimo niini.
Giingon ni Dr. Ira Lee Rosalita, minister sa Christian and Missionary Alliance Churches of the Philippines (CAMACOP), nga hilom ang bibliya sa hisgutanan nga cremation busa walay rason aron magkasungag ang pagtoo sa mga relihiyon ug sa mga tawo niini.
Base sa pagtuon, nagsugod ang cremation sa stone age partikular sa Slavic Tribe sa Europe ug Western Russia 3000 BC ug hangtud miabot kini sa British Isle kun Spain ug Portugal 2500 ug 1000 BC hangtud sa 400 AD.
Pipila sa mga nasud misunod sa cremation kini mao ang China, Amerika, Canada, Pilipinas ug daghan pa apan karon ang pagsunog sa patay’ng lawas usa na ka dako nga negosyo sa kalibutan karon.
Sumala ni William Dankenbring kinsa usa ka scholar sa bibliya, matawag nga tunglo sa Dios ang dili paglubong sa patay’ng lawas sa tawo nga mabasa sa Old Testament busa ang mga Judio wala nagpraktis og cremation.
Apan segun ni Dr. Ira Lee Rosalita, magdepende na kini sa kultura sa tawo kun ginasunog ba o wala ang ila minahal sa kinabuhi nga mipanaw na sanglit dili kini mokontra sa Bibliya.
Ang labing gikabalak-an sa mga eksperto karon mao ang paglubo sa populasyon sa mga tawo nga muabot sa 11 bilyon pag-abot sa 21st century.
Maghatud og dakong problema sa kalibutan ang pagdaghan sa mga tawo tungod dili na pupaigo ang 197 million square miles kun 510 million kilometers gilapdon sa kayutaan.
Usa sa mga opisyal sa City Government nga nahinabi sa STP Investigative Team nagpadayag sa tumang kabalaka nga basin muabot ang panahon mag-inilugay na ang buhi ug ang patay sa dyutay nga yuta kun dili ipatuman ang cremation.
Mao nga pabor si Dr. Ira Lee Rosalita nga pa-undayunan na lang ang kultura ug praktis sa kadaghanan nga mag-cremate sa mga minatay apan supak kini nga magpanday og balaod alang ani nga katuyuan.
RadyoMaN Joel Viray
