Talisay City, Negros Occidental – Isa na naman ka kaso sang ginakabig ‘crime of passion’ ang nahimo sang isa ka bana sa ‘kerido’ sang iya misis sa ciudad sang Talisay.
Sa imbestigasyon sang Talisay City Police Station, posible ‘love triangle’ ang motibo sang pagpaniro, pagpangbuno kag pagpanglabo sang suspek nga si Sonny Boy Gregorio, 31-anyos ang edad sa ginaalegar ‘lover’ sang iya asawa nga si Erly Gregorio, 31-anyos and edad lunsay pumuluyo sang Brgy. Pandanon, Don Salvador Benedicto.
Nakilala naman ang ginbuno nga si Marlon Gozon, 43-anyos, tumandok man sang Salvador Benedicto.
Las 8:20 Dominggo sang gab-i, Enero 28 natabo ang insidente sa balay ni Joelito Udtujan, tiyo ni Erly, sa Barangay Dos Hermanas, Talisay City.
Suno pa sa imbestigasyon, Disyembre sang nagligad nga tuig sang nagkadto si Erly sa balay sang iya tiyo nga si Joelito upod si Marlon nga iya ginpakilala nga iya nobyo.
Dugang pa sang isa pa guid ka tiyo ni Erly nga si Rogelio, ginhambala sila sini nga nagbulagay na sila ni Sonnyboy kag si Marlon ang bulag man sa iya asawa.
Lipud sa ihibalo ni Erly, nga siya ang gina-monitor ni Sonnboy kag posible nga may nakahatag sa iya sang impormasyon nga ang asawa ang yara sa iya tiyo sa Talisay.
Bangud sini, tigayon nga nagtimalos ang bana pinaagi sa pagkadto sa balay ni Joelito kun sa diin didto iya naabtan sa gamay nga payag payag sanday Erly kag Marlon nga nagahulid pasado las-11 kagab-i.
Gintiro ni Sonnyboy si Marlon sang makapila ka beses kag wala pa siya nakuntento diri, iya pa nga ginlabo kag ginbuno ang biktima nga nangin rasun sang iya kamatayon.
Matapos ang insidente, gilayon nga nagpalagyo si Sonnyboy samtang si Erly naman ang ginapangita pa.
Na-recover sa crime scene ang isa ka binangon nga 20 inches ang kalaba-on kag duha ka wala naglupok nga bala sang .38 calibre revolver.
Ang mag-asawa ang may bata nga duha, 15-anyos kag 10-anyos naman ang isa.
—————————-
For more news updates like our official Facebook page: www.facebook.com/ifmbacolod943
