‘Crime of passion’ motibo sa pagpatay sa sundalo sa iyang kabaro

Davao City – Kasong murder ug frustrated murder ang atubangon sa usa ka sundalo nga suspek sa pagpusil-patay sa iyang kabaro, nahitabo sa Barangay La Filipina, Tagum City, Davao del Norte niadtong Mayo 12, 2023.

Sa interbyu sa DXDC RMN Davao kang Police Lieutenant Colonel Jeffrey Latayada, Acting Chief of Police sa Tagum City Police Station, gisulti niini nga ‘crime of passion’ ang motibo sa pagpusil sa biktimang si Jayson Cawayan, 34 anyos, Armed Forces of the Philippines (AFP) member ug residente sa Montevista, Davao de Oro.

Subay sa imbestigasyon, kanhi karelasyon sa suspek nga si Corporal Reibong Medalla, 43 anyos, taga Cambagonoy, Asuncion, Davao del Norte ang babae nga angkas sa biktima nga si Rizamae Samon.

“Dati mana sila magkarelasyon ang babae ug kadtong suspek nato. Then, afterwards, nagbulag sila then kadtong babae napud naay bag-o siya nga kadtong namatay (biktima),” sulti ni Latayada.

Kahinumduman nga sakay sa motorsiklo ang biktima ug ang iyang hinigugma sa dihang kalit nga mibutho ang suspek ug kalit nga gipusil.

Sa pagkakaron, hustisya ang singgit sa pamilya, kabanay ug higala sa biktimang sundalo.

RadyoMaN Kirby Manzon