Davao City – Gipusil gawas mismo sa ilang pinuy-anan ang usaka kanhi pulis alas-6:00 sa kagabhion sa may Block 3, Lot 3, Uraya Subdivision, Mankilam, Tagum City.
Mga imbestigador nag-ila sa biktima nga usaka Gomercindo Estelloso, 50 anyos ug minyo kinsa nagtindog lamang gawas sa ilang pinuy-anan niadtong tungora sa dihang kalit gipusil sa makadaghang higayon sa duha ka wala mailhing mga suspetsadong luwan sa motosiklo.
Daling gidala ang biktima ngadto sa Davao Regional Medical Hospital aron matambalan diin karon gikataho nga anaa pa kini sa kritikal nga kondisyon, sumala sa attending physician.
Narekober sa crime scene ang mga bala sa .45 kalibreng pistola ug gikustodiya sa Davao Norte Provincial Crime Laboratory Office alang sa Integrated Ballistics Identification System (IBIS) profiling.
Gipalawman pa sa mga awtoridad ang imbestigasyon aron pagsuta kun kinsa ang mga nagpaluyo ning maong insidente.
Kahinumdoman nga kini na ang ikatulong insidente sa pagpamusil sa maong area diin sa unang mga insidente, patay ang mga biktima human gibanhigan sa mga riding-in-tandem suspects ingon man blangko pa ang mga tinugyanan sa motibo sa pagpamusil.
Gi-awhag karon sa kapulisan ang publiko kinsa nakasaksi sa maong mga panghitabo nga makig-alayon aron maresolba ang maong krimen.
RadyoMaN Jason Amisola
