Davao City – Subay sa kamanduan sa Department of Interior and Local Government (DILG) Davao Region nga gipagula duha na ka bulan nakalabay,hugot gidid-an ang mga local chief executives nga mubyahe kung dunay kalamidad sama sa bagyo nga muhampak sa ilang mga dapit.
Nasayran nga ang maong direktiba sa rehiyunal nga buhatan subay kadto sa mando sa DILG Central Office kung asa ang tanang mga local chief executives dili palakton ug paluparon sa laing nasud kung dunay hulga sa kalamidad ang ilang mga lugar hatud sa nagkabangis na nga panahon karon.
Matud ni DILG-XI Regional Director Alex Roldan nga bisan pa og andam na ang tanan alang sa paglakat apan kung adunay kalamidad obligado ang mga opisyal sa pagkanselar sa ilang mga lakaw aron pangunayan mismo ang pagmonitor sa dagan sa panahon ug pagresponde panahon sa emerhensiya.
Sumala ni Roldan, ilhon nga criminal negligence ang pagbiya sa mga opisyales ug mas palabihon ang paglulinghayaw ug kaugalingong kalipay luyo sa kasayuran nga dunay kalamidad muabotay sa ilang mga lugar.
Nanganti si Roldan nga dili siya magduha-duha sa pagpasaka og kasong administratibo ug kriminal batok sa mga opisyal nga magpasagad sa ilang mga katungdanan ug obligasyon sa oras sa pagsuway mugna sa nagsalimuang nga panahon karon.
Giklaro pa sa opisyal nga langkub usab sa kamanduan ang mga barangay diin ang maayong taho karon mao nga hangtud wala pa’y ni usa ka opisyal sa lokal ang nakasupak ug nasang-atan og sumbong gumikan sa wala pagsanong sa naasoyng orden.
RadyoMaN Joel Viray
