Sa pakighinabi sa DXDC RMN Davao kang Police Corporal Dennis Retiza, imbestigador sa Compostela Municipal Police Station (MPS), iyang giila ang biktima nga si Jhon Lester Alibangbang, 18 anyos, criminology student, residente sa Barangay Naboc, Monkayo, sa maong probinsya.
Saysay sa pulis nga gikan sa kalingawan sa Barangay Poblacion Gym ang biktima sa dihang adunay laing grupo sa mga batan-on nga maoy nagbunal og gahing butang asa naigo kini sa agtang ug nagkadugo. Gilayon usab nga gidala sa ospital ang biktima nga anaa karon sa Davao Regional Medical Center (DRMC) sa Tagum City.
Matud sa pulis nga usa sa gipalawman nila nga anggulo mao ang kalabotan sa relasyon human nga aduna matud pay gipangulitawhan ang biktima, apan ang babae aduna nay hinigugma.
“Kadtong information gikan sa paryente niya nga tropa kauban Accordingly, naay gipanguyaban ang biktima nga nag-board diri sa Compostela. Unya kadto iyang gipanguyaban is naa poy uyab. Karon, gina-locate na namo tong bayahana para maistorya pud namo,” sulti sa imbestigador.
Sa pagkakaron, gipaniguro usab ni Compostela Mayor Levi Ebdao nga mapadali ang imbestigasyon sa insidente ug mapanubag ang mga responsible niini. Giklaro usab sa alkalde nga alas 12:00-12:30 sa kaadlawon nahuman ang aktibidad sa Poblacion.
RadyoMaN Kirby Manzon
