Davao City – Nawad-an og kredibilidad ang kasamtangang gobyerno sa iyang kampanya kontra droga human gitaktak sa National Prosecution Service ang drug case batok nila Kerwin Espinosa, Peter Lim ug Peter Co. Nabutang sa kwestiyonableng sitwasyon ang sinseridad sa kagamhanan karon kung seryoso ba gayod kini sa war on drugs nunot sa pag-abswelto nila Espinosa ug sa duha ka Chinese national ning ulahing adlaw. Gisukmatan ni Nagkakaisa Labor Organization Secretary General Mike Ybanez ang gobyerno sa iyang saad nga tuldokan ang suliran sa droga karon nga nakalingkawas sa kaso ang tulo ka druglords. Gibatikos ni Ybanez ang administrasyon nga maayo lang mupatay og yano apan kun adunahan gawas nga miagi sa due process abswelto pa gayod sa kaso. Gibigwasan ni Ybanez si Justice Secretary Vitaliano Aguirre tungod sa iyang mga desisyon nga maayo lang makaduot ug yanong tawo apan kun sapi-an ug ilado maka-ikyas sa kaso bisan og nalakip sa narco list ni Duterte. Gani kamatuoran niini, wala pa’y nakita ang naasoy nga leader nga adunay gi-abswelto si Aguirre nga yano apan sa mga kwartahan ug mga opisyal daghan na sama ni Police Superintendent Marvin Marcos ug sa iyang grupo kinsa nakabalik sa serbisyo. Si Marcos kanhi hepe sa CIDG 7 kansang grupo maoy nakapatay kang Albuera Mayor Espinosa atol sa pagsilbi sa warrant of arrest sulod sa Leyte Provincial Jail. Unang gikataho nga gibarugan ni Presidential Legal Adviser Salvador Panelo nga walay epekto sa kampanya kontra droga sa administrasyong Duterte ang pagbasura sa PNS sa kaso sa giilang mga druglords. Apan alang ni Ybanez, kawang ug walay pulos ang kamatayon sa liboan ka tawo nga nalambigit sa droga sanglit maabswelto ra man usab diay ang mga arestadong drug lords. RadyoMaN Joel Viray tags: dxdc 621 davao
