Davao City- Aduna nay inisyal nga hinabang gi-release ang City Social Services & Development Office (CSSDO) sa kagamhanang lokal alang sa mga nasunogan sama sa pagkaon, banig, habol, moskitero ug gamit sa kusina diin gitunol na kini ngadto sa 81 ka mga pamilya partikular sa mga fire-stricken areas sa San Vicente, Zone 4, Barangay Buhangin, ning dakbayan.
Matud ni CSSDO District Head Norman Baluro, mokabat sa 77 ka balay ang totally-damaged, usa partially-damaged, 17 ka mga renters, 8 ka mga sharers ug 5 ka mga boarders.
Gidugang ni Baluro nga kadtong anaa sa tally sa mga ‘totally damaged’ makadawat ug P10,000.00 partially-damaged P5,000.00 samtang ang sharerS ug boarders makadawat ug tag P2,000.00 matag usa kanila.
Paningkamotan usab sa syudad nga mas mapadali kun paspasan pa ang pagproseso sa maong financial assistance.
Ang mga nabiktima sa sunog anaa karon temporaryong gihikling sa Buhangin Gym samtang nagpaabot pa sa dugang hinabang ug mientras gihimo pa ang ‘clearing operations’ alang sa mga butang nga mamahimo pang mapuslan.
Mokabat sa 100 ka mga gambalay sa maong area naugdaw sa dihang kalit nga nisila-ob ang kandila nga gidagkotan apan nakalimtan sa tag-iya giila nga usaka Rizalino Monleon.
RadyoMan Don Pulayao
