Ya nega el City Social Welfare and Development Officer Sockie Roxas cay chene pa sila unliquidated pondo de nueve milyones de pesos desdel feeding program del govierno entendido para con el mga day care centers na entero ciudad.
Ya sale publicao del pasao dia na un periodico nacional cay uno del top ten ciudad que nuay pa fuede liquida el fondo del feeding program.
Asegun con Roxas na entrevista del RMN Zamboanga, cay ese report que ya publica del pasao mez de Hunyo pa que donde aura na fuede ya sila sumite el report na DSWD head office na valor de 27 milyones y chene pa ya devolve mas de cuatro mil como balanse del tal programa.
Presentamente, ya man-release ya asegun canila el siguiente fondo por el semejante programa na cantidad de 29 milyones de pesos para continua el feeding program para el mas de tres sientos mga day care centers na entero ciudad.
Si Roxas ya abla cay chene sila bastante documentaccion aserca el conducta del tal programa y mismo el DSWD 9 amo el ta man monitor el diila implementaccion de este. – *Bhong Simbajon/RMN News*
