Davao City- Gi apod-apod na sa City Social Welfare and Development Office (CSWDO) ang immediate needs ngadto sa mga biktima sa baha sa dakbayan sa Davao.
Sa interbyu sa RMN Davao kang Atty. Marlisa Gallo, CSWDO head, matud niini nagmuntar og mga tents sa mga evacuation sites aron katulgan sa mga biktima sa baha, nitunol usab og hot meals, habol ug banig.
Gipasabot ni Gallo nga wala na usab magmuntar og modular tent ngadto sa mga evacuees nga anaa sa Juliville gym tungod adunay daghang mga construction materials ang gym ug kasagaran usab sa mga residente wala nalang nagpabutang sa mga tents.
Tulo ka mga kabalayan ang nadeklarang partially damage. Sumala ni Gallo nagpadayon usab ilahang assessment ilabina kung luwas pa ba nga puy-an ang ilahang mga lugar nga duol sa mga kasapaan.
Sumala ni Gallo, mudawat og pinansyal nga ayuda ang mga pamilyang naguba ang ilahang mga balay tungod sa nahitabong kalamidad.
Base sa report sa CSWDO anaa sa 10,000 ka pamilya ang apektado sa pag-awas sa Davao River gikan sa Barangay 2A, Barangay 5A, Barangay 8A, Barangay 9A, Barangay 10A, Barangay 19B, Barangay Maa, Barangay Waan, Barangay Tigatto, Barangay Bantol, Barangay Tamugan ug Barangay Buda.
RadyoMaN Aimee Guinita
