Davao City – Nagpabiling lig-on ug malipayon ang katawhan ilabi na ang mga inosenteng mga bata nga naapektohan sa pagdahili sa yuta sa Zone 1, Barangay Masara, Maco, Davao de Oro.
Pinaagi sa pagpaningkamot sa probinsyal nga panggamhanan sa Davao de Oro, usa ka grupo gikan sa City Social Welfare and Development Office (CSWDO) ang mibisita sa evacuation center sa Nuevo Iloco High School.
Sa ilang pagbisita, mihanyag ang ilang opisina og psychosocial activities ug stress debriefing sa kabatan-onan.
Gani makita sa ilang mga hulagway ang kalipay human sa managlahing intervention programs agi og suporta aron mahatagan og kahupayan ug kasulbaran ang emosyonal nga samad nga gibilin sa maong panghitabo.
Mapasalamaton ang mga bata ilabi na ang mga ginikanan sa gipangtunol usab nga mga pagkaon, school supplies ug mga hygiene kits nga ilang magamit samtang wala pa silay mabalikan nga pinuy-anan.
RadyoMaN Ivy Parido
Facebook Comments
