Davao City – Giawhag karon sa City Social Welfare and Development Office kun CSWDO sa Davao City ang mga residente sa syudad nga i-report sa ilang opisina o barangay og dunay reklamo bahin sa gipang-apod-apod nga ration goods subay sa inisyatibo sa gobyerno nga manghatag og ayuda gumikan sa COVID-19 crisis.
Sa pakighinabi sa DXDC RMN Davao kang Malou Bermudo, Davao CSWDO Head, nakigkoordinar sila sa mga barangay ug mga purok sa syudad aron didto salaon ug kinsa ang pwede maka avail sa food assistance pinaagi sa masterlist nga i-identify sa CSWDO diin basehan nila niini ang mga pangalan nga nasulod sa 3 parameters.
Hinuon padayon ang monitoring sa CSWDO bahin sa mga report sa ration goods.
“So far wala pa man tay report nga nag violate sa distribution kay nag house to house ug kadtong mga brgy. ginahatod sa purok, ginaobserbahan. Mao bitaw kauban sa army, military, ug brgy. naghangayo nga tabangan ta og monitor, so far wala pa. Mao na ang uban mga reklamo sama sa wala na enter, wala gi-include, pabor-pabor o pulitiko, wala nato giistoryahan diri ang pulitika o registered voters baka, kung nasulod ka sa 3 parameters mu-qualify ka sa hinabang sa syudad sa Davao, segun ni Bermudo.
Samtang gisaysay ni Bermudo og kinsa ba ang pwede maka-avail sa rasyon pinaagi sa ilang gimugna nga 3 parameters:
1. Indigents nga na out of work tungod sa COVID ug samot naapektuhan sa kalisod ug wala nay ikahatag nga pang adlaw-adlaw nga panginahanlanon sama sa pagkaon parasa pamilya,
2. Mga contractual workers, job orders nga no work no pay ang mga kumpanya o temporaryo nag close o nag close nagyud,
3. Self-Employed na out of work, sample market vendors, masahista, manicurista kung walay customer walay kita anang adlawa aron i-suporta sa mga pamilya
Subay niini, nanghinaut karon ang CSWDO nga magtinabangay ang mga dabawenyo pinaagi sa pagsunod sa proseso sa gipatumang mga lakang aron dungan nga mabatukan ug mapugngan ang pagkuyanap sa COVID-19.
RadyoMaN Renz Barbarona
