CTTMO, hugot bantayan ang Davao airport batok taxi drivers nga di mugamit og metrohan

Sugdan na sa Davao City Transport and Traffic Management Office (CTTMO) kaalayon ang uban pang mga ahensya sa City Government ang pagbantay sa airport human ang mga reklamong adunay taxi drivers ang dili mugamit og metrohan o manikas pinaagi ang ‘pakyawan scheme’.

Sa usa ka interview, gibutyag ni CTTMO Head Dionisio Abude nga magbuntang sila og enforcers sa airport aron masigurong manubag katong taxi drivers nga magmasupakon sa lokal ug nasyonal nga balaod.

Sumala pa nga mag-deploy og mga personahe ang CTTMO uban ang LTFRB XI ug CAAP Davao aron sutaon ang mga driver kung aduna ba silay ID, uniform, tama ba ang metrohan ug kompleto ba ang dokumento ug prangkisa.

Tagaan usab ang mga pasahero og papel kung asa nakasulat ang impormasyon sa taxi nga ilang nasakyan o angayang sakyan kinsa mao lang ang gitugotan nga makasulod sa airport ug makapasakay og pasahero.

Sa pagkakaron, giplastar na sa CTTMO ang ilang operational plan unsaon nila pag edukar o paghatag impormasyon sa katawhan aron dili sila mabiktima sa susamang modus.

RadyoMan Ivy Parido