Davao City-Adunay giluwatan nga bahad karon ang City Transport and Traffic Management Office ngadto sa katawhan ug drivers nga nadakpan atol sa nagpadayong implementasyon sa Anti Jay walking Ordinance ug maong uban pang mga traffic regulations.
Matod ni CTTMO Chief Dionisio Abude, sukad pa niadtong Setyembre 11 ngadto 29, mukapin sa 6,000 ka mga pedestrian ug drivers ang wala pa ni-settle sa mga citation tickets nga gitunol ngadto kanila.
Giingon ni Abude, atol sa 12,206 ka mga citation tickets na ilang natunol sa katawhan adunay 3,444 ka mga drivers ang wala pa mi-settle sa ilang citation tickets samtang 2,364 niini mga pedestrian.
Dugang ni Abude kung dili nila kini ayuson human sa pito ka adlaw,alang sa mga pedestrian violators, ipasaka na ang complain batok kanila ngadto sa City Legal Office diin moresulta kini sa suliran sa dihang maglukat sila og mga papeles gumikan na record naman ang ilang kalapasan sa maong buhatan.
Sa pikas bahin gipaniguro ni Abude nga ilang aksyonan ang mga defective nga traffic lights karon sa dakbayan gani aduna nay mga traffic enforcers nga naka destino sa maong mga areas aron i-manage ang traffic flow.
Aminado si Abude nga nanginahanglan pa sila og dugang gidaghanon sa mga traffic enforcers ilabi na gumikan sa kadaghan sa mga road intersections sa dakbayan.
RadyoMan Abi Bibera
