Davao City – Sama sa mga miaging tuig, giplanuhan karon sa City Transport and Traffic Management Office kun CTTMO ang traffic re-routing alang sa umaabot nga kalag-kalag.
Sa interview sa DXDC RMN Davao kang CTTMO head Retired Superintendent Dionisio Abude, gibutyag niini nga nagpagula na sila og proposed traffic re-routing schemes lakip na ang mga parking assignments sa mga dagkong sementeryo dinhi sa syudad sa Davao.
Ipangmungtar ang mga traffic advisories sa mga kadalanan aron makagiya sa mga motorista atol sa kalag-kalag.
Gani subay sa tumong nga mahimong hapsay ang dagan sa trapiko sa syudad nianang mga adlawa, ipang deploy usab ang mga traffic enforcers sa nagka-daiyang bahin sa syudad ilabi na sa mga sementeryo.
“Sa petsa 30, naay deployment nga 100, pagka petsa 31, 150, sa uno ug dos (November), tag 300 ang deployment, naa man tay Traffic Community Network nga gitawag nga TrafCoN,’’ segun ni Abude.
Pipila sa mga sementeryo ang giplanuhan sa traffic re-routing schemes mao ang Buhangin memorial park, Chinese Cemetery, San Pedro, Forest Lake, Orchard memorial park, Masonic, Wireless, Catholic Cemetery ug Davao Memorial Park.
RadyoMan Renz Barbarona
