Davao City- Aron malikay sa bug-at nga trapiko sa kadalanan, dili magkaguot sa mga parking areas ug aron dili maglisod sa pag-gawas ug pag-sulod sa mga sakyanan, kung mahimo likayan nga magdala og private cars padulong sementeryo atol sa kalag-kalag inay pwede mag taxi o musakay og mga pampasaheroang sakyanan.
Kini ang gisulti ni City Transport and Traffic Management Office kun CTTMO Retired Superintendent Dionisio Abude atol sa interview sa DXDC RMN Davao kaniya diin laumang dagsa ang mga tao nianang mga adlawa sa sementeryo.
Dugang ni Abude, dili man malikayan nga mudala og mga sariling sakyanan apan paningkamutan lang unta nga matarong kini og parking lakip na usab sa pedestrians diin gitambagan usab niya ang katawhan nga muagi sa mga dalan nga para sa pedestrians aron dili magdungan sa mga sakyanan nga musulod-gawas sa sementeryo hinungdan sa trapiko.
Kahinumduman nga nagpagula na kagahapong adlawa ang CTTMO og proposed traffic re-routing schemes lakip na ang mga parking assignments sa mga dagkong sementeryo dinhi sa syudad sa Davao.
RadyoMan Renz Barbarona
