CTTMO: Traffic lights sa Davao ayuhon, rerouting ginatun-an

Davao City – Paningkamutan karon sa Davao City Traffic and Transport Management Office (CTTMO) nga masolusyonan ang problema sa trapiko sa dakbayan sa Davao.

Sa interbyu sa DXDC RMN Davao kang Alfredo Tamayo, Assistant Traffic Operation Officer sa CTTMO, gibutyag niini nga sa meeting sa Local Government Unit (LGU) Davao uban ang Metro Manila Development Authority (MMDA) niadtong Pebrero 20, 2023, ilahang pangitaan og solusyon ang problema sa trapiko sa syudad, diin usa sa nakitang problema ang traffic lights.

“Ineffective ang atong traffic light tungod man gud kay wala siya naka-calibrate. Meaning to say, dapat i-adjust ang mga oras, ang timing sa atoang traffic light,” matud ni Tamayo.

Matud ni Tamayo, i-assess usab sa MMDA kung unsa pa ang mga problema sa trapiko sa syudad aron didto ibase ang programa o lakang nga himuon pagpa-improbar sa dagan sa trapiko.

Dugang sa CTTMO official nga ginatan-aw usab ang pagbaton og traffic scheme o rerouting, aron malikayan ang huot nga dagan sa trapiko sa dakbayan.

RadyoMaN Kirby Manzon