Davao City – Dili na mamahimong magbahis-bahis sa national highway dinhi sa dakbayan sa Davao ang mga tricycle ug pedal-operated trisikad, ug motorized tricycle sa matag barangay.
Kini human sugdan na sa City Transport and Traffic Management Office (CTTMO) ang pagparehistro sa maong mga sakyanan ngadto sa ilang buhatan tumong nga maregulate na kini.
Gipasabot ni CTTMO chief Ret. Col. Dionisio Abude nga parte sa Davao City Traffic Code nga marehistro ang tanang tricycle, pedal-operated trisikad ug Motorcycles-for-Hire sa CTTMO gani butangan na kini og CTTMO number, color coding ingon man tatak sa ilang kalawasan aron dali nalang mailhan ang ruta niini.
“Ang naa sa Traffic Code nga kung aduna silay bisan usa ka violation i-impound gayud dayon ilang sakyanan ug dad-on sa atong opisina (CTTMO) aron didto i-settle,” saysay niini.
Gikanayon ni Abude nga gikinahanglan irehistro ug iregulate ang maong mga sakyanan sanglit daghan na ang namasahero sa pipila ka barangay rason sa panaglalis gumikan sa pag-ilugay og mga pasahero.
Dugang sa hepe sa CTTMO sugdan nila ang maong pagparehistro sa downtown area ug di madugay sa kabarangayan na diin i-prayoridad nila ang adunay kasamtangan o expired na nga Motorized Tricycle Operators Permit (MTOP) kinsa sagad wala na nagrenew gumikan sa mga colorum.
“Kabalo man ko sa status, wala sila nag renew kay daghan na kaayo ang colorum,nganong mu-renew man tama man pod, pero it’s about time nga iregulate na nato kay dugay naman ni nga balaud,” butyag niini.
Nasayran nga ang Ordinance No. 0334-12 kun Comprehensive Transport and Traffic Code of Davao City naaprubahan niadto pang tuig 2012.
RadyoMaN Jason Amisola
