Arestao el cuatro miembros del budol-budol gang despues ya puede pidi ayuda el con quien estos ya hace victima, un senior citizen nombrao como si Redempta Lomongo, 77 anyos de edad, residente de Estrada street, brgy Tetuan serca ala una del tarde.
Con el maga ya sale arestao ya conoce como canda Juvenalia Milan y Busio, 50 anyos de edad, nativo de Toril Davao, Thelma Rruz y Mendoza, 46 anyos de edad, residente de brgy Labuan en este ciudad, Antonio Leong y Ibanez jr, 69 anyos de edad, nativo de Cebu city, y si Raymun Talaboc y Mariscal, 42 anyos de edad, nativo de Digos Davao city.
El incidente ya occuri na Veterans avenue cuando ta compra medicina el victima, ya attraca asegun el uno del maga suspechao ya pretende de pregunta, y amediante ta man cuento sila, ya aparece el un mujer que conchavo del primer suspechao, hasta ya puede conele combinsi munta le na vehiculo del maga suspechao.
Mientras encamino ya sila para na Guiwan, ya manda conele el maga suspechao pasa na diila casa y ya manda saca el su passbook, emergency money, jewerly y atm, y despues ya manda otraves munta conele y ta lleva conele para na guiwan donde ay anda asegun sila na un tienda, pero mientras abordo le na kotse hunto con maga suspechao, ya puede le accorda que no vaya ta hace conele loco, si por que ya llama le con su anak.
Ensiguidas tambien ya hace apas el anak del victima para na guiwan, el tiempo ya puede este pidi ausillo con el maga police baho na city mobile force company que aquel tiempo talla na San Bernardino bridge. Ya precura pa asegun escapa el maga suspechao pero ya alcansa siempre canila na guiwan y ya puede aresta.
El police ta pidi con el maga ya queda de budol-budol gang para anda na diila estcaion y verifica cae no vaya estos lang siempre el maga suspechao ya hace canila victima.
