Cuesta ug Guarin murder case buhion

General Santos City— Misaad si Undersecretary Joel Egco, Director of Presidential Task Force on Media Security nga sobli niining buhion ang mga kasong pagpatay sa pipila ka mga mediamen sa SOCCSKSARGEN.

Usa sa gitumbok nga kaso ni USEC Egco mao ang murder case nilang Denis Cuesta, kanhing Program Director sa DXMD RMN General Santos ug Cris Guarin, publisher ug Editor In Chief sa usa ka local nga pamantalaan sa Gensan.

Nasayran nga unang gipusil si Cuesta Agosto 4 tuig 2008 apan gibawian kini sa kinabuhi human sa lima ka adlaw, samtang si Cris Guarin gipusil patay Enero 5 tuig 2012. Si Guarin mao na ang ika 150 ka mediaman nga gipatay sukad tuig 1986.


Nasayran nga human sa pipila ka mga katuigan wala pa gyuy hustisya ug maayung resulta sa kaso sa mga biktima. Sumala ni USEC Egco nga ilahang ablihan pag-usab ang kaso ni Cuesta ug Guarin aron kini sobling matutukan.

Sa kaso ni Cuesta buot niining susihon nganong wala pa gihapon maserve ang warrant of arrest sa suspek nga si retired police officer Redempto Boy Acharon nga unang migawas niadtong tuig 2009. Gikumpirma usab ni USeC Egco nga anaa na sa Task Force ang folder sa mga kaso nilang Guarin ug Cuesta.

Facebook Comments