Davao City- Daghan ug bitbit nga bentaha kun benepisyo ang bag-ohay pa lamang naaprobahan sa House Committee on Welfare of Children nga curfew bill kun ‘Safe Hour for Children Act’ sa mga menor de edad.
Segun kang Social Welfare and Development Undersecretay Luzviminda Ilagan, halangdon ang tumong ug katuyuan sa bag-o lang napasar nga pagpalig-on sa mga regulasyones aron panalipdan ang mga kabataan nga mahimong biktima sa kriminalidad gumikan lamang sa paglatagaw sa dis-oras sa kagabhi-on.
Dugang sa maong opisyal, kinsa nahimo usang kanhi konsehal sa syudad sa Davao ug representante sa women partylist organization nga Gabriela, angay hinoon nga balansehon kini sa ‘freedom of movement’ sa atong mga teenagers.
Kini nga sugyot balaudnon-nasyunal tinukmod lamang usab sa lokal nga ordinansa sa syudad sa Davao diin gidid-an ang paglibot-suroy sa mga batan-on kun lawom na ang kagabhi-on diin sagad nagapanghitabo ang kriminalidad ug bisyo sama sa droga, teenage pregnancy, alcohol abuse, youth gangs ug riots ug uban pa.
Ubos sa balaudnon, did-an na ang paglatagaw sa kabatan-onan gikan sa alas-10:00 sa kagabhi-on ngadto sa alas-5:00 sa sayong kabuntagon aron aduna silay proteksyon gikan sa posibleng pagpang-abuso ug eksploitasyon.
Sa susamang regulasyon, tumbokon ang pabaya nga mga ginikanan pinaagi sa silot kun penalties lakip na ang pag-render ug community service.
RadyoMan June Duterte
