Davao City – Dili mawala sa mga Pilipino ang pagkamatoo-tohoon mahitungod sa dili kasarangang makita sama sa espiritu o kalag nga sagad magpabati sa mga nahibiling kabanay niining kalibutana.
Daghan ang nagtoo nga mag-kondenar ug mubalik ang kalagsa namatay aron mubisita sa mga buhi pinaagi sa damgo o dili ba kaha magpakita sa palibot.
Kini nga superstitious belief gikan pa sa katigulangan ug napanunod karon maong matag Nobyembre, ginahinumdoman gayod ang mga namatay aron dili na sila mangsurang-surang sa mga buhi.
Apan matud ni evangelical pastor Rev. Dominador Cabuenas, walay kamatooran ug dili tinuod nga mubalik pa ang kalag sa minatay dinhi sa kalibutan aron magpabati sa mga buhi.
Sumala ni Cabuenas, human mamatay ang tawo sa pisikal nga aspeto kun dimension, ang kalag niini awtomatikong magpaabot sa paghukom sa Diyos diin kini nagpasabot nga dili na mubalik sa kalibutan ang kalag subay sa Hebrews 9:27.
Mabasa sa Bag-ong Tugon nga usa ka dato mi-apelar nga kun mahimo, pabalikon si Lazaruz sa kalibutan human sila namatay aron suginlan ang mga buhi mahitungod sa kainit sa impiyerno.
Gipasabot ni Cabuenas nga ang kalag nga magpakita ug magpabati dili iya sa namatay inay gigamit sa dautang espiritu ang dagway sa mipanaw aron linglahon ug patohoon ang mga buhi.
Dugang ni Cabuenas nga ang tradisyon ug tinohoan nga gisunod sa kadaghanan ug sa pipila ka relihiyon sama sa Romano Katoliko pagano kini nga practice sanglit wala kini manukad sa pulong sa Diyos kun Bibliya.
Gitin-aw niini nga walay sayop ang pagpreserba ug pagduaw sa lubnganan apan nunca nga makig-istorya kita sa patay sa katarongan nga bisan og pila pa ka trumpeta ang gamiton, dili ug dili na gayod sila makadungog pa.
Ang tambag ni Cabuenas mao nga atong hingpit isalikway or i-rebuke ang tanang buhat sa kangitngit pinaagi sa walay kinutubang gahum sa atong mas gamhanang Diyos sa kalangitan.
RadyoMaN Joel Viray
