Davao City – Panahon na nga puohon ang presensya sa mga korap sulod ug gawas sa Bureau of Customs!
Tino kini nga pagpadayag sa mga panahum niadtong mga nahinabi sa programang ‘Straight to the Point’ sa DXDC 621 RMN Davao sa topiko nga ‘Customs Corruption’ kalabot sa mga nadiskubrehang hao-shiao diha karon sa atong nasudnong buro sa adwana.
Apan pipila usab ang nagpasidaan: Dili ing-ana kasayon ang kampanya batok sa pundok sa mga dautan sama niadtong nagpaluyo sa pagpalusot sa kantidad P6.4B methamphetamine hydrochloride kun shabu gikan sa China.
Sa atong pakighinabi kaniya, gi-esplikar ni AKBAYAN Partylist Rep. Tomasito ‘Tom’ Villarin nga dili na bag-o ang isyung korapsyon sa adwana kun waterfront apan karon mas nisi-aw kini ilabi na sa dihang nasindulan sa mga awtoridad ang latest shabu shipment diin nadalahig ang daghang mga personalidad lakip na gani ang gitawag nga ‘Davao Group’ diha sa customs.
Matud ni Villarin, angay sabton nga halawom ang suliran sanglit nahimo nang ‘systemic’ kun natanum na diha sa atong psyche kun kultura o pagkatawo ang pagpangawkaw sa panudlanan sa nasud hinungdan nga gikinahanglan usab nato ang mas maisogong matang sa krusada kontra korapsyon.
Pabor ang kongresista sa panglantaw nga urgent karon ang pagpangita’g mas epektibong mga istratehiya sama sa pagseguro nga gamay lamang ang ‘human intervention’ sa mga proseso sa custom gikan sa valuation sa mga tariff ug customs duties niini hangtud ngadto sa kinatumyang proseso sa aktwal nga pag-release sa mga ‘dutiable goods.’
Uyon usab ang katawhan nga adunay dakung nesesidad nga hugtan ang pagbantay sa mga kontrabandong sagad makalusot sama sa mga ‘chopchop’ vehicles, used clothings kun ‘ukay-ukay’ ug uban pa gumikan kay mabayran man ang pipila ka mga personahe ug kadagkuan ning revenue-generating agency sa kagamhanan.
Sa hisgotanang imbestigasyon sa mga dagkung pangalan nga naapil sa alegasyong customs syndicate, si Villarin nagtoo nga angay una mabatonan ang lig-ong mga ebidensya sanglit dili man makabarug ang yanong pasangil lamang pinasikad sa kuno tabi-tabi lang nga walay kalahian sa ‘pure hearsay’ ilabi na kun walay corroborating kun supporting testimonies sa uban ug samot kun ang nag-akusar walay personal knowledge sa akusasyon.
Kasamang June Duterte
