Cyber Sex Den operator nga nadakpan sa Polomolok-gipangkasuhan na

63

General Santos City—Gikumperma ni NBI Regional Director Olivio Ramos nga hingpit nang nakasuhan ang usa ka aktibong pulis ug tulo pa ka kaubanan niini kansa gitudlong operator sa duha ka cyber sex den sa Polomolok, South Cotabato.

Mga gikasuhan mao silang si Po3 Retchie Boy Silot Buca nga aktibong miyembro sa Tupi Municipal Police Station, Jessa Canja Penacerada ug ang mag inahan nga si Guillerma ug Maria Jemma Penacerada Zarate.

Ang mga nasangpit nadakpan atol sa gihimong ronda sa NBI sa duha ka managlahing cyber sex den sa lungsod sa Polomolok nga makaplagan sa Barangay Cannery ug Barangay Poblacion.

Gikumperma usab ni Director Ramos nga duha ka bulan nilang namonitor ang iligal nga operasyon sa mga nasangpit ayha nila kini gipailawom sa ronda.

Nasayran nga narekober sa ilang tropa ang mga computer, laptop nga may mga webcams, microphones, wifi router, cellphones, mga suga, wigs, make-up kits, sexy apparels, bank books, mga credit cards ug daghan pang uban.

Atol sa ronda unom ka mga kababayen-an ang narescue apil na dinhi ang upat ka mga minor de edad kansa maoy nagaperform ug hilas atubangan sa ilang ka chat nga mga foreigner.

Facebook Comments