Davao City – Dili malimod nga may halapad nga kasayuran ang katawhan mahitungod sa paglahi ug paglabay sa sakto nga butanganan sa basura apan wala lamang kini panumbalinga.
Dyese syete na ka tuig sukad nabalaod ang Republic Act 9003 ug ang Ecological Solid Waste Ordinance sa siyudad apan ang problema wala kini sunda sa mga tawo.
Buot ni Interface Development Intervention kun IDIS focal person Chinkie Pelino Golle nga sikopon ug silotan ang mga tawo nga padayon nagasupak sa balaod ug sa ordinansa.
Human mi-arangkada ang Coastal Clean-up Program niadtong Oktobre 24 ug hangtud niadtong adlaw’ng Sabado karong bulana, dul-an usa ka gatos ka libo ka kilo sa basura ang nahipos gikan sa 32 ka barangay.
Sa 32 ka barangay, ang mga barangay sa 21,22,23,27,31, ug 76 nagsumikad ang tonelada sa basura diin ang pinakadaghan ang barangay 21, ug 23 ug sagad sa nakolekta mga cellophanes.
Giingon ni Barangay 76-A Kapitan Bogart Trajera nga iya na gihimo ang tanan apan tungod sa kagahi sa ulo sa mga tawo mao nga nagbaha gihapon og mga basura ang iyang barangay.
Ang ka-iresponsable sa paglabay sa basura bunga kini sa sobra ka immaturity sa mga tawo busa ang nasakripisyo mao ang kadagatan ug kinaiyahan sa dakbayan.
Nahibaloan nga natudluan ug nadisiplina na unta ang mga tawo sa segregation apan wala kini namintar human napalong ang kalayo sa istrikto nga pagpatuman sa Solid Waste Ordinance sa dakbayan.
Dili na buot ni Golle nga mangtulisok og mga opisyal sa barangay man sa siyudad kay ang importante karon mao ang pagsalba sa kinaiyahan ug sa kadagatan gikan sa ecoli bacteria tungod sa mga basura.
Gihagit sa focal person sa IDIS ang mga barangay opisyal sa pagtukod og Material Recovery Facility alang sa basura kay mao kini ang gimando sa balaod diin kasagaran wala magtuman niini.
Ang kahinlo sa palibot ug sa kadagatan nagdepende na kini sa mga nanungdanan sa barangay kana kung unsa sila kadasig sa pagpasabot sa ilang katawhan sa pagsunod Solid Waste Ordinance ug RA 9003.
RadyoMaN Joel Viray
