Davao City – Mag amping kanunay ug maminaw sa saktong impormasyon ilabi na panahon nga dunay katalagman.
Kini mao ang tambag ni City Disaster risk Reduction Management Office head Alfredo Baluran ngadto sa publiko subay sa nahitabong kagubot sa mga Dabawenyo nahitabo adlaw’ng Miyerkules sa gabii human nakasinati og Magnitude 6.3 nga linog ang Digos City diin Intensity 5 ang nabati sa Davao.
Sumala ni Baluran, daling mikalat ang mali nga impormasyon rason nga nag panic ang publiko gani nitambag kini nga maghulat sa saktong impormasyon aron malikay sa susamang panghitabo.
“Ang linog dili na makamatay pero kung magpanic ka dira naka madisgrasya. Kung sundon lang nila ang tanang gitudlo diin halos tanang barangay (sa coastal areas) ang gibalik-balikan og tsunami drill, earthquake drill kay mao man ang susceptible sa mga tsunami ug daghan namuyo,” segun niini.
Gipasabot sa kanhi pulis nga normal lang ang nahitabong pagbaba sa lebel sa tubig kagabii sanglit low tide niadtong panahona.
Kahinumduman nga miresulta sa kahuot sa kadalanan sa Mc Arthur Highway kagabii human nanagan ang mga residente sa Matina Aplaya paingon sa Shrine Hills human dunay nikalat nga impormasyon nga nahubas ang tubig ug moresulta matud pa sa tsunami.
Apan gipabalik gilayon sila human gipaklaro sa CDRRMO ug ni Mayor Sara Duterte-Carpio nga walay tsunami warning alert sa Davao.
RadyoMaN Jason Amisola
