Davao City – Giklaro karon sa konsehal sa ikatulong distrito sa syudad sa Davao Conrado “Conde” Baluran sa mga Dabawenyo nga dili lang dayon mabalaka sa mga lakang sa gobyerno sa pagpahamtang sa taas nga buhis sa giingong mga ‘sugar-sweetened beverages’ ug uban pa tungod kay padayon pa kining gituki og posibleng dili pa dayon kini mapahamtang.
Sumala sa chairman sa Committee on Transportation and Communication, diri sa syudad sa Davao wala sila magtutok sa pagpahamtang og dugang buluhisan aron dili maglisud ang katawhan kon dili ang paghatag ug insentibo sa mga negosyante aron magbutang ug mga negosyo aron daghan ang makatrabaho.
Gipasabot ni Baluran bugtong gihimo karon sa City Council mao nga sunod tuig magpatuman sila og 5-year holiday sa mga investors pinaagi sa parking spaces nga dili sila mobayad og buhis sulod sa lima ka tuig sama sa Manila nga nagbutang og mga dagkong parking space.
Samtang giklaro usab ni Baluran nga aprobado na sa konseho ning syudad ang pagpatuman sa ‘half rice’ sa mga menu sa mga restaurant ug food chain sa dakbayan. Matud niya mamahimo nang maka-order og ‘half-rice’ ang kadtong dili gustong mokaon og daghang kan-on.
RadyoMaN Bernard Pantallon
