Dabawenyos dismayado nga lisod matuman ang P20 kilo sa bugas

Davao City – Nasinati sa pipila na ka mga adlaw o semanang nilabay ang padayong pagtaas sa presyo sa mga pamaliton karong mga panahona ilabi na ang kantidad sa bugas nga anaa sa P50 ngadto sa P60. Daghan na ang nagyawyaw, daghan na ang nagpaabot sa ilang mulo ug daghan na sab ang nanawagan kung asa na ang P20.00 nga kilo sa bugas.

Apan, imposibleng matuman matud pa sa Department of Agriculture (DA) ang gisaad ni President Ferdinand Marcos Jr., nga himoong P20 ang kada kilo sa bugas sa nasud nga mao unta’y makatabang sa mga kabus ug sa mga ubos nga nanginahanglan.

Gikasubo sa Overseas Filipino Worker (OFW) nga si Daisy Daig nga taga Tibal-og, Sto Tomas, Davao del Norte, nga inay moubos ang presyo sa palaliton, mitaas na hinuon. Dugang niya, mas gihatag pa og panahon sa presidente ang pagbiyahe, inay tutokan ang nag-unang problema sa Pilipinas.

“Nagsige nalang travel around the world. Sige og pangumusta anang uban butang nga wala’y mga pulos. Wa man niya kumustaha ang mga mulo sa mga tao nga maoy nagpalingkod sa iyaha kung asa siya nahimutang karon,” kumento ni Daig.

Sumala kang DA Undersecretary Leocadio Sebastian nga lisod nang makab-ot ang P20 nga bugas tungod usab sa tumong nga tutukan una ang mga mag-uuma sa bisan unsa pa mang kalambuan nga anaa sa sektor sa agrikultura.

Apan, nagpasalig ang DA nga dili magkulang ang pundo sa bugas sa nasud bisan nga giangkon na niini nga gamay karon ang stock ug nagataas ang presyo niini.

RadyoMaN Ivy Parido