Davao City – Giawhag karon ni Davao City Councilor Melchor Quitain Jr. ang mga Dabawenyo nga mag-inquire na ngadto sa ilang nagkadaiyang barangay hall alang sa ilang barangay IDs.
Sa gipahigayong Pulong Pulong ni Pulong karong adlawa, giklaro ni Quitain nga sa milabay pa nga tuig na-aprubahan ang maong ordinansa.
Giklaro usab sa 18th City Council Majority Floor Leader nga wala nila gi-require ang tanang kabarangayan gumikan mamahimo kining unconstitutional.
Sumala ni Quitain nga naga-release na ang pipila ka mga barangay sa dakbayan sa Davao diin anaa sa P20-P50 ang kantidad sa bayaran samtang matud pa walay bayad sa pipila ka mga barangay ug gisugilon nga dili renewable ang maong ID system gumikan sa mahinayon nga National ID system.
Samtang suportado usab ni Davao City Councilor Mabel Acosta ang maong sistema diin segun niini nga sagad usab problema sa mga under graduates ug non-professional workers mao ang walay ikapresentar nga government valid ID.
Kasamtangan adunay 15 gawas 82 ka mga barangay dinhi sa syudad ang nagpapasa sa maong ordinansa apan pito lamang niini ang nag-implementar sa maong barangay ID system nga mao ang Bucana, Matina Pangi, Brgy. 17-B, Marilog,Tamayong, Mahayag, Bunawan, ug Brgy. 38-D.
RadyoMaN Jason Amisola
