Dabawenyos, giawhag ni Mayor Baste nga i-report ang illegal activities sa Davao City Reports

Davao City – Gidasig ni Mayor Baste Duterte ang dabawenyos nga dili mahadlok musukol kung nasayod unsay sakto batok sa illegal nga mga aktibidad sa Davao City.

Sa Facebook post sa mayor, usa ka dabawenya ang misumbong nga gipabayad matud pa sila sa traffic officers human sila giharang sa highway aron dili na mudako pa ang bayrunon.

Kini ang gikasuko ni Baste ug giawhag ang publiko nga dili kini kunsintihon ug kuhaan dayon og pangalan ug picture ang mga illegal activities ug ipadala sa Davao City Reports aron gilayong maaksyunan.

“If you tolerate and pay the enforcers instead of reporting them to the Davao City Reports page that means you are part of the problem. Ayaw mo kahadlok musukol ug unsay sakto. Tinabangay ra ta,” sulti pa ni Duterte.

Ang Davao City Reports (DCR) usa ka plataporma sa dakbayan nga nagsugod niadtong October 10, 2017 diin ang dabawenyos mamahimong magpaabot sa ilang mulo online sa DCR Facebook page.

Giawhag usab ang katawhan nga dili magduha-duha og sumbong sa illegal nga binuhatan sa mga public official ug private institution sa dakbayan.

RadyoMaN Ivy Parido