Dabawenyos nabalaka sa epekto sa Russia-Ukraine war

Davao City – Pipila lamang sila Kristel Ramos ug Julios Flores gikan sa Davao Region sa mga netizen nga nabalaka sa tensyon karon tali sa Russia ug Ukraine human nga nagpatuman ang Russia og full-scale invasion pinaagi sa missile strike nga miresulta usab sa pagdeklara sa Ukraine og Martial Law.

Sa kumento sa netizen nga si Kristel Ramos sa DXDC 621 RMN Davao Facebook page, nag-ampo kini nga maluwas ang mga inosenteng tawo ilabina gyud ang mga Pinoy nga anaa karon sa Ukraine, butang nga gisiguro usab sa Department of Foreign Affairs (DFA) ang maong measures.

“Ginoong Diyos, intawon luwasa ang mga sibilyang inosente intawon. Labi na ang mga Pinoy nga tua karon sa maong lugar,” kumento niini.

Samtang, gikabalaka sa netizen nga si Julios ang epekto sa maong tensyon dinhi sa Pilipinas diin posibleng muresulta sa pagmahal sa produktong petrolyo, butang nga gipangandaman usab sa Philippine government pinaagi sa Department of Energy (DOE) ug uban pang hingtungdang ahensya.

“Laing nasud nag giyera, kita pud apektado. Sigurado usbaw sa palaliton na pud ni kay musamot kamahal ang gasolina,” kumento niini.

Nasayrang giputol na usab sa Ukraine ang ilang diplomatic relation sa Russia subay sa anunsyo ni Ukraine President Volodymyr Zelenskyy tungod sa ilang gihimong pagpangatake diin aduna nay natalang mga namatay.

RadyoMaN Kirby Manzon