Davao City – Suportado sa kadaghanan sa mga taga-Davao ang gikasugyot nga national registration sa tanang mga Subscriber Identity Module (SIM) cards or packs silbing security measure niining delikado nga mga panahon.
Sa interview sa morning primetime radio social commentary program ‘Straight to the Point’ sa DXDC 621 RMN Davao, mayoriya kun 90% sa mga tigpaminaw nipadayag sa ilang tumang suporta sa SIM pack regulation haron masumpo ug malikayan nga magamit ang teknolohiya alang sa criminal activity, advocacy ug terrorism.
Usa sa mga panelist nga nitampo sa iyang panahum kaganina mao si University of Mindanao – Institute of Popular Opinion (UM-IPO) director Dr. Adrian Tamayo.
Segun kang Tamayo, walay angay kabalak-an nga ang naasoyng regulasyon kun balaudnon makalapas sa atong mga individual right to privacy sanglit wala man kita gidid-an pagkupot niini apan pinasubay sa hustong mga lagda sa balaud.
Wala usay nakitang dautan ang propesor sa pinakadako nga private higher learning institution sa Davao Region nga implikasyon niini diha sa mas halapad nga gipangayong anti-terrorism campaign sa kagamhanan.
Gani mas maayo kun ang SIM card regulation mamahimong tipik ug kabahin sa usaka national ID system diin solamenteng mabalaka mao lamang kadtong mga tawong dautan.
Gipaambit usab sa educator ang nahimong kasinatian sa ubang kanasuran sama sa Thailand, Africa ug Estados Unidos diin mas bug-at pa gani ang ilang counter-terrorism laws and legislations.
Pananglit sa America, gituhuang lig-on kaayo ang ilang Homeland Security Act ilabi na gumikan sa ilang nahimong mapait nga kasinatian sa 9/11 terror attacks sa Twin Towers.
Dinhi sa Pilipinas, napanday na ang usaka Human Security Act apan bisan kini nga pasiunang matang sa anti-terrorism measure gilantaw karon sa mga hanas ug batid sa balaud ug seguridad nga daghan pang mga areas of improvement nga mamahimong ma-incorporate sa naasoyng balaud.
Kasamang June Duterte
