Manila, Philippines – Ipinag-utos na ni Supreme Court chief Justice Teresita Leonardo De Castro ang pagpapatupad ng umento sa sahod ng first level judges sa bansa epektibo July 1 ng taong ito.
Ang first level judges ay mga hukom ng municipal trial courts, municipal circuit trial court, municipal trial courts in cities at shari’a circuit courts.
Mula sa salary grade 26 at 27, inakyat ito sa salary grade 28 at sila ay tatanggap na ng sweldong P127,000 mula sa kasalukuyang P102,000 hanggang P114,000.
Ang pagtataas sa sweldo ng mga first level judges ay panukala ni Supreme Court Administrator Jose Midas Marquez.
Ang pondo para sa dagdag sweldo ng mga hukom ay kukunin mula sa savings ng mga lower courts sa buong bansa.
Ito ay habang hinihintay ang Notice of Organization, Staffing and Compensation Action (NOSCA) at pag-isyu ng budget department ng kaukulang budget sa salary increase.
