Busa gidasig ni DCPO Director Police Colonel Alberto Lupas ang iyang mga ginsakpan nga magpabiling aktibo ug alerto sa paghatag og seguridad sa mga Dabawenyo ug sa mga bisita nga buot musaksi sa mga kalihokan sa Araw ng Dabaw nga opisyal nang gibuksan kagahapong adlawa.
Giangkon ni Task Force Davao Commander Army Coronel Darren Comia nga wala sila’y namonitor nga hulga sa mga teroristang grupo apan giawhag niini ang tanang security personnel ug force multipliers nga dili magkumpiyansa ug bantayan gayod ang palibot sa dakbayan aron walay makasabotahe sa hapsay ug linaw sa siyudad.
Una nang gibatbat ni Public Safety and Security Command Office Head Angel Sumagaysay nga puno og dagkong aktibidad ang dakbayan karon nga buwan.
Segun ni Sumagaysay, pipila sa mga nakalinyadang aktibidad mao ang MICE Conference, Ironman, League of Prosecutors of the Philippines, Concert nga siguradong tan-awon sa libu-libo ka mga tawo ug wala pa’y labot ang mga kalihokan sa Araw ng Dabaw mismo.
Matud ni Sumagaysay, nagpasalamat si Mayor Sebastian “Baste” Duterte sa men in uniform sa kanunay nga pagsiguro sa kalinaw ug kaluwasan sa siyudad gikan sa mga dautang elemento.
RadyoMaN Joel Viray
