Nagpakabang residente duol sa Punoan sa dakong kahoy didto sa Brgy. Sta. Filomena nanawagan nga hatagan ug pagtagad ang maong kahoy kay gamay nalang ang naghawid niini.
Nanawagan karon ang pipila ka mga concern citizen nga nanimuyo sa brgy. Sta Filomena particular mente sa dalang nasyunal. Tungod kay adunay dakong punoan sa mahogany nga nabuho na kini.
Ang maong kahoy matod pa gamay pa kaniadto ang buho niini apan nagkadako kini tungod sa kadugayon, gawas nga natural lang ang iyang lungag niini midako kini ug samot human nga adunay maglabayan ug basura dayon ilang isulod ug dauban, hinungdan nga kan-on gayud sa kalayo ang punoan.
Kini karon ang gikahadlokan sa mga residente kay basin unya ug matumba panahon nga hanginon ug kusog, ilabi na nga gamay nalang ang naghawid niini sa iyang punoan. Risgo usab kini sa mga motorista tungod kay anaa kini sa daplin sa dalan.
Sa pakighinabi niining inyong tigbalita ngadto sa barangay kapitan nga si Armando Deliganio gibutyag niya nga dugay na usab kining gireklamo sa mga katawhan panahon pa nga konsehal pa siya niadtong higayona, nagtuo siya nga wala na ang maong punoan apan anaa pa diay kini.
Ang tag-iya matod pa sa maong punoan mao si Juan Lim ug gidumalahan na kini karon ni Patricia Yang gani matod pa nga ila naman usab kining giduol sa City Environment and Natural Resources (CENRO) dinhi sa atong dakbayan apan wala paman gihapon kini naaksyonan.
Dugang pa ni Sta. Filomena, Brgy. Kapitan Armando Deliganio nga iya kining subayon ang maong punoan aron maka plano siya kung unsay angayng buhaton niya.
