General Santos City—samang balhog ang usa ka pusher ug 3 ka mga estudyante ug laing usa pa human naaktuhang nag pot session sa usa ka balay sa may Purok San Isidro, Barangay Baluan, Gensan alas 5:45 ang takna sa hapon, kagahapong adlawa, March 7, 2018.
Unang gipahigayonan ug buybust operation ang suspek nga si Christian Laurez Rodrigo, Alias Enchong, 20, residenti sa maong lugar. Napalitan kini ug (1) ka sachet sa gituohang shabu gamit ang P500.00 nga marked money.
Apan samtang gihimo ang operasyon, kalit midagan ang suspek padulong sa ilang balay mao nga siya gigukod sa kapulisan, didto na naaktuhan ang 3 ka mga estudyante ug usa ka merchandiser nga nag pot session sulod sa usa ka lawak.
Gipangdakop ang mga nasangpit nga silang si Mark Lagang, 24, estudyante, nga taga Barangay Lagao; Christopher Dimson, 25, merchandizer nga taga barangay Lagao, Gensan, Jason James Jacinto, 28, estudyante, residenti sa Surallah, South Cotabato ug Jan Elton Bruce Heolin, 25, estudyante, residenti sa Malungon, Sarangani Province.
Nakuha sa posisyon sa mga nasangpit ang mga Illegal Drugs Paraphernalia’s. Karong adlawa gikatakdang pasakaan ug kaso ang mga suspek human nga nasikop sa kapulisan.
