Davao City – Nagpatala sa Tugbok PNP ang biktima nga mao si Michele Monungolh, 18 anyos, dalaga, residente sa Lower Rapnaga Barangay Bago Aplaya, Davao City, human mahagbong sa kanal kay gisukmag sa tag-iya sa balay nga iyang gisukahan.
Sa blotter sa Tugbok Police Station, gireklamo sa biktima si Ramon Romano, 44 anyos, residente sa Sitio Mahayahay Barangay Tugbok, Davao City, tungod sa pagpangulata.
Sumala sa dalaga nga buot niyang musuka tungod sa kahubog ug didto nagpadaplin sa tugkaran nga gipanag-iyahan ni Romano.
Pagkakita sa suspek nga gisukahan sa dalaga ang iyang tugkaran nahitabo gilayon ang mainitong lalis hangtud nga misangko sa pagpangluta.
Matud pa sa dalaga nga human siya maigo sa nagpungasi nga kinumo nahagbong siya sa kanal rason sa pagkabaton ug mga bun-og ingun man pangos sa kalawasan niini.
Gitambagan sa mga pulis ang dalaga nga mukuha’g medical certificate aron himuong ebidensya sa iyang pagpasaka og kaso batok sa suspek.
RadyoMaN Erin Lumosbog
