Nailigtas ng National Bureau of Investigation (NBI) ang isang 16-anyos na menor de edad at naaresto ang tatlong indibidwal sa isinagawang operasyon laban sa umano’y qualified human trafficking sa La Union.
Nag-ugat ang operasyon sa referral ng CSWD kaugnay ng dalawang menor de edad mula Bukidnon na nakatakas umano sa isang bar.
Sa imbestigasyon, lumabas na inalok umano ang mga biktima ng trabaho bilang restaurant staff sa Maynila, ngunit sa halip ay dinala sa La Union at pinilit magtrabaho bilang mga bar girl.
Sinasabing pinagsamantalahan ang kahinaan ng mga biktima at umano’y pinilit makipagtalik sa mga kostumer kapalit ng ₱1,500 sa ilalim ng tinatawag na “bar fine” scheme. Iginiit din umano ng may-ari ng establisimyento na may utang ang mga biktima dahil sa pamasahe sa eroplano at iba pang recruitment expenses.
Matapos makumpirma na may isa pang menor de edad na patuloy na pinagsasamantalahan sa naturang lugar, agad nagsagawa ng operasyon ang mga awtoridad. Dito nailigtas ang 16-anyos na biktima at naaresto ang tatlong suspek. Nakumpiska rin sa lugar ang talaan ng bentahan ng alak at bar fine, gayundin ang dalawang notebook na may listahan ng mga pangalan at kaukulang bayarin.
Sa kasalukuyan, nasa pangangalaga ng CSWD ang nailigtas na menor de edad, habang nakakulong na sa San Fernando City Jail ang mga naarestong suspek. |𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
