Un dalaguita y un OFW maga mas reciente victima de tiro y ya muri na dos separao incidente enantes aga na Bunguiao y Sta. Barbara.
Banda alas 2:20 del aga cuando si Angelica Arquiza y Dionisio, 18, junto consu aguela si Rosita Arquiza y Maningo, 81 y su hermano menor si Jeremie, 16, ta dormi adentro del diila casa na Sitio Waray-Waray, Bunguiao donde tiene ya lang un persona ya aparese y ya hace suut su pusil na din-din y ya sopla de tiro pa adentro y ya tupa con Angelica.
Si Angelica ya muri dayun y nohaymas este puede pa disperta mientras el suspechao ya escapa unseguidas.
El maga pulis del Sangali police station ya aguanta con el cuñao del victima donde tiene cuantos evidencia el ta ensiña conele como el possible hechor del matansa.
El pulis ya habla que problema entre man familia amo el possible motibo del incidente.
Asegun tiene que hace na dinero el rason si porque ya sosede el que no deve sosede.
El informarcion ya obtene el maga pulis amo ya tene agravio el suspechao con el familia del su esposa quien ta trabaja naotro paiz y envez este imbia conele cen, con el su maga hermana y hermano este ta imbia.
Mientrastanto, muerto tambien si Sadikal Apostol y Sarail un OFW, 30-años de edad y residente de Ayer Village, Sta. Barbara despues tiene tambien quien ya sopla de tiro conele pasada ala una del aga enante.
Na report del pulis ta aparese pa entrada ya na gate del diila casa galando con su motorsiclo si Apostol cuando tiene quien ya llama su nombre.
Ya para pa si Apostol y ya precura mira si quien ta llama conele person el persona derepente ya lang ya tira conele por dos beses que ya tupa na sup echo.
Con el victima ya puede pa lleva na hospital pero ya declara con este dead on arrival el maga doctor.
El criminal ya entabla para na dirreccion del Martha Drive, Sta. Catalina despues del incidente.
El maga pulis ya recobri un capsula y un punta del bala de caliber 45 pistola na lugar del crimen.
