San Manuel, Isabela – Naaresto kagabi ang dalawang binata matapos na maaktuhan ng mga kasapi ng PNP San Manuel na gumagamit ng marijuana sa Brgy. District 1, San Manuel, Isabela.
Kinilala ang mga suspek na sina Aldrin Tamara Tanayo, labing walong taong gulang, isang estudyante at residente ng Brgy. San Placido, Roxas, Isabela; Isaac Cristobal Rogado, labing siyam na taong gulang, binata, high school graduate at residente ng Brgy. Nuesa, Roxas, Isabela.
Sa inisyal na imbestigasyon ng mga otoridad ay naaktuhan umanong gumagamit ng iligal na droga ang dalawang suspek partikular ang marijuana.
Nakuha sa pag-iingat ng mga suspek ang isang pakete ng dried marijuana, pitong rolled papers na may lamang dahon ng marijuana, isang cellphone at iba’t ibang dominasyon ng pera.
Ang mga suspek maging ang mga nakumpiska sa mga ito ay dinala na sa himpilan ng pulisya para sa karagdagang imbestigasyon at dokumentasyon.
Inihahanda narin ang kasong paglabag sa RA 9165 o Dangerous Drugs Act laban sa mga suspek.
