Kalaboso ang dalawang hinihinalaang nagtutulak ng ilegal na droga makaraang maaresto sa isinagawang buy-bust operation sa P. Francisco St., Brgy. Krus na Ligas, Quezon City.
Kinilala ang mga suspek na sina a.k.a Benjamin, 64 anyos, at a.k.a Albert, 44 anyos na kapwa residente ng Brgy. Krus na Ligas, Quezon City.
Ayon sa isinagawang imbestigasyon ng Quezon City Police District (QCPD), ang mga operatiba ng District Drug Enforcement Unit ay nagsagawa ng drug buy-bust operation sa No. 56 P. Francisco St., Brgy. Krus na Ligas, Quezon City na nagresulta sa pagkakaaresto sa naturang mga suspek.
Narekober sa mga suspek ang 20 gramo ng shabu na nagkakahalaga ₱136,000.00 cellular phone at buy-bust money.
Paglabag sa RA 9165 o Comprehensive Dangerous Drugs Act of 2002 ang kasong isinampa laban sa naturang mga suspek.
