Davao City – Dungan ang mga tukar nga pampasko gakambyo-kambyo usab nga mga colorful nga disensyo nga maoy ni-iwag sa City Hall of Davao pinaagi sa usa ka 3D Projection Mapping.
Mga magpamilya, maghigala, mga bata nidagsa sa City Hall aron saksihan kining pinasahing kalingawan nga giprepara sa lokal nga panggamhanan alang sa tanang mga Davaoeños sukad nga pormal nga gi-ablihan kini sa publiko niadtong Nobyembre 25 atol sa Dan-ag Davao.
Karong tuiga Winter Wonderland ang tema sa Pasko Fiesta!
Atol sa countdown nakatutok ang mga tao ug syempre naka ready ang mga cellphones ug gadgets aron makuhaan gayod ang pagpasiga sa higanteng Christmas Tree sa Rizal Park.
Dili lamang kana ang giandam sa lokal nga panggamhanan kay ang Philippine Philharmonic Orchestra nga usa sa mga nag-unang musical group sa nasud ug sa Asia-Pacific region ang mao gayuy nitugtug atol sa opening sa Pasko Fiesta.
Gilingaw usab ang mga audience sa tubong Davao nga si Jona Marie Soquite sa iyang song performance ug way kabutngan ang kalipay usab sa tanan sa pagharana ni Prince of Pop Erik Santos.
Mapasalamaton si Davao City Mayor Inday Sara Duterte-Carpio sa tanang mga opisyales sa lokal nga panggamahanan ug uban pang mga sektor aron mahimo kining posible.
Buot gayod sa alkalde nga malipay usab ang mga kabataan ug mabati sa tanan ang tinuod nga diwa sa kapaskuhan.
RadyoMaN Aimee Guinita
