Davao City – Gibutyag karon sa tinubdan sa Davao City Anti-Drug Abuse Council (CADAC) nga 29 ka mga barangay sa syudad sa Davao ang wala mipartisipar sa programa sa gobyerno kontra iligal nga droga.
Atol sa gipahigayong presser sa Royal Mandaya Hotel, giigon ni CADAC Technical Adviser on Drug Prevention and Rehabilitation Connie Domag nga sagad barangay nga wala nagpatuman mao ang anaa sa poblacion area.
Hinuon dugang ni Domag nga pipila niini miduol kanila ug nangutana sa proseso unsaon pag implemetar niini sa tagsa-tagsa ka barangay.
Dugang niini, gikalipay ni Domag nga 100% sa hilit nga lugar sama sa Paquibato ang ni-implementar niini.
Samtang, gi-angkon ni Davao City Police Office (DCPO) Spokesperson Capt. Ma. Teresita Gaspan nga sagad operasyon sa droga ginapahigayon sa poblacion.
Base sa ilang datos, nakatala og 1661 ka mga indibidwal na ang nadakpan gikan Disyembre 5, 2017 hangtod sa kasamtangan.
Sa maong ihap, pinakadaghan ang nadakpan sa Sta. Ana PNP nga dunay 455 ka indibidwal, ikaduha ang Bunawan PNP nga dunay 296 samtang anaa sa ikatulo sa pinakataas nga nadakpan ang Talomo PNP nga dunay 208.
Gani magpadayon sa gihapon ang ilang mga operasyon sabay sa pag-awhag sa mga barangay officials nga mamahimong aktibo sa mga programa sa gobyerno aron hingpit nang mabatukan ang droga sa syudad.
RadyoMaN Jason Amisola
