Davao City – Dol-an 60 na ka vaccination sites ang anaa sa syudad sa Davao alang sa pagpalapad ug paspas nga nagpadayong pagbakuna sa publiko batok Coronavirus Disease 2019 (COVID-19).
Matud ni Dr. Michelle Schlosser, Spokesperson Task Force COVID-19 Davao City (sa interbyu sa city-owned radio), aduna nay 59 ka vaccination sites ang dakbayan ug 21 niini ang gidumala sa City Health Office (CHO), 9 ka hospital-managed sites ug 29 ang sectoral sites o kadtong mga vaccination hubs sa A4 o mga frontline workers.
Samtang gikumpirma usab ni Schlosser, walay natalang major adverse effects sa mga nabakunahan na batok COVID-19 gawas lamang sa mga minor adverse effects sama sa labad sa ulo, pagkaluya, pagsakit sa lawas ug pagsakit sa dapit asa gitusok ang bakuna, apan kini mawala ra usab ug dili magdugay.
“So far, wala ‘tay mga natala nga (adverse) events na rare and fatal, wala ‘ta ana. Sa mga nangahadlok, usabon nako wala gyud ‘tay natala so far. Kasi if ever po we will have that, naa ‘tay proper investigation to do that,”
Subay sa datus sa Davao City Vaccination Report base sa July 15, 2021, aduna nay 290,946 ang bakunado sa 1st dose ug 112,499 sa second dose gikan sa A1 hangtud A5 priority group.
RadyoMaN Kirby Manzon
