Sa interview sa DXDC RMN Davao kang Agriculturist II ug Rice Production Focal sa DCAO, Pablita “Bing” Almador, iyang gibutyag nga bisan wala pa’y mag-uuma nga nidangop sa ilang buhatan, kabalo silang daghan sa ilaha ang nakabalaka. Tungod sa rice production, pag aduna’y presyo nga musaka o mubaba, damay ang tanang supply.
Hinuon, gikan pa kaniadto, aduna na’y ginatunol nga libreng semilya ug fertilizer discount voucher ang gobyerno ngadto sa mga mag-uuma bisan sa wala pa naduso ang price ceiling.
Sa pagkakaron, andam na sab ang lokal nga paggamhanan sa Davao sa paghatag og tabang sa mga rice farmers pinaagi sa pagtunol sa mga nag-unang panginahanglan aron sa pagpalambo sa mga pananom ilabi na karon nga masinatian sa nasud ang El Nino.
“Bag-o lang mi nahuman og meeting sa atong mga supplier puhon sa atoang fertilizer. So hopefully, by next week maka-start tag distribute sa atong mga beneficiaries nga narehistro sa registry system sa atong national government,” segun ni Almador.
Lauman nga sa panahon sa ting-ani, mubalik na sa normal ang supply ug presyo sa bugas.
RadyoMan Ivy Parido
