Davao City – Nadepensaan gihapon sa Davao City Durians ang titulo diin gideklara kining over-all champion sa natapos nga DAVRAA Meet 2019 niadtong Sabado sa Davao City-UPMin Sports Complex.
Base sa final and official nga resulta nikolekta og 170-125-59 gold, silver ug bronze nga mga medalya ang defending
champion.
Nagpabilin usab sa 1st runner-up spot ang Tagum City nga adunay 56 golds,59 silvers ug 47 bronzes.
Gikan 3rd runner-up sa nakalabayng tuig nisaka sa 2nd runner-up ang Panabo City nga nikolekta og 45-40-51 samtang ang Digos City anaa sa 3rd runner-up sa 26-26-43 medal counts.
Gipangunahan ni Davao City Mayor Inday Sara Duterte-Carpio ang closing ceremony sa DAVRAA 2019 ug nibilin kini’g pagtulun-an sa tanang mga atleta nga himuong prayoridad ang lawas subay kini sa pagkamatay sa 12 anyos nga volleyball spiker sa Davao Oriental tungod sa Dengue ug Pneumonia.
“To all the athletes kabalo ko nga gusto ninyo mudula ug gusto ninyo makadaog but please always remember that our health is our most important treasure. As athletes ang inyong lawas ang inyong puhunan wa tay maangkon nga medalya kung ang atong lawas wala sa kondisyon kung naglain ang atong paminaw we must put our health first,” matud sa alkalde.
Opisyal usab nga giturn-over sa dakbayan sa Davao ang hosting sa DAVRAA 2020 ngadto sa Compostela Valley Province.
Samtang, gigraduhan og 9.5 sa Department of Education XI ang DAVRAA 2019.
Matud ni DepEd Spokesperson Jenelito Atillo nga ilang gipangandoy nga makuha og balik sa Davao Region ang number one spot sa Palarong Pambansa 2019 karong Abril dinhi sa lungsod.
“It is really a dream of any sporting delegation to replace NCR as the champion since time in memorial. In 2000 or in 2002 kita ang over-all champion we hope to have a repeat especially it will be in our hometown,” sumala ni Atillo.
Generally peaceful usab ang Davao City atol sa DAVRAA 2019 kini base sa security assessment ni Davao City Police Office head PSSUPT Alexander Tagum atol sa interbyu sa RMN Davao.
RadyoMaN Aimee Guinita
