Davao City- Nominado pag usab ang syudad sa Dabaw alang sa prestihiyosong Presidential Award for Child-Friendly Municipalities and Cities (PACFMC).
Giingon ni City Social Services and Development Office (CSSDO) Chief Maria Luisa Bermudo nga ang maong nominasyon pagpakita lamang sa mga epektibong programa nga gipatuman sa syudad aron maundang na ang pag abusar sa mga kabatan-onan ug ipromotar ang ilang katungod.
Nasayran nga ang syudad nakadawat og susamang award niadtong tuig 1998, 1999, 2013, 2014 ug tuig 2015.
Nominado usab karong tuiga ang ubang syudad sama sa Iloilo, Baguio ug Parañaque.
Matod kang Bermudo, ang syudad sa Dabaw padayong nagapaningkamot aron mapalig-on ang mga programa gitumong alang sa pagpalambo sa interes sa kabatan- onan.
Usa sa mga programa niini mao ang Kean Gabriel Hotline, diin nasayran nga aduna nay 483 ka mga kabatan-onan na rescue gumikan sa maong sistema.
Gawas niini, nagmuntar usab ang syudad sa Dabaw og Quick Response Team for Children’s Concern (QRTCC), nga gibuhat aron mag rescue ug mag inbestigar sa mga kaso sa sexual exploitation ug uban pa batok sa mga kabatan-onan.
Gipalig-on usab sa lokal nga panggamhanan ang Paginhawaan Drop-in Center alang niadtong mga problemadong batan on nga nanginahanglan sa temporary shelter and protection ingon man ang pag pundar sa Lingap Center for Mentaly Challenged Chilren.
Prayoridad usab sa syudad ang pag mintinar sa daycare services alang sa mga anak sa mga personahe sa dakbayan ilabi na kadtong nag edad og 5 paubos diha sa Child Minding Center sa kagamhanang lokal.
Kun mulampos ang syudad karong tuiga, mahiapil na kini sa talaan sa ‘Hall of Fame’ awardees sa maong pasidungog, segun kang Bermudo.
RadyoMan Abi Bibera
